ქრისტიან-დემოკრატებს მიგვაჩნია, რომ იმ ღირებულებათა შენარჩუნება-განვითარება, რომელთაც მომავალში ქართველი ხალხის კეთილდღეობა და უსაფრთხოება უნდა დაეფუძნოს, მხოლოდ განათლების სამართლიანი და ქმედითი სისტემის წყალობითაა შესაძლებელი. ამ კუთხით უმთავრესი პრობლემა განათლების სოციალური პოლიტიკაა, ამიტომაც ქრისტიან-დემოკრატების გამარჯვების შემთხვევაში გადაიდგმება შემდეგი ნაბიჯები:
- სასკოლო სახელმძღვანელოები დაურიგდება ყველა ოჯახს, რომელიც არ იხდის ქონების დეკლარირებულ გადასახადს;
- გაიზრდება სკოლების ვაუჩერული დაფინანსება, პედაგოგები უზრუნველყოფილი იქნებიან 900-ლარიანი საბაზისო ხელფასით, პორტატული კომპუტერებითა და სასკოლო სახელმძღვანელოებით;
- ყველა სოფელში აღდგება სკოლა;
- სახელმწიფო მხარს დაუჭერს მასწავლებელთა კვალიფიკაციის ამაღლებას და მათი საუნივერსიტეტო მომზადების სისტემის სრულყოფას (სამაგისტრო პროგრამების სახელმწიფო მხარდაჭერა, არაქართულენოვანი მოსახლეობისთვის კადრების მომზადების სპეციალური პროგრამის ამოქმედება);
- დაიწყება მართლმადიდებლური კულტურის ისტორიის სწავლება სკოლებში;
- საატესტაციო გამოცდების ჩაბარებით და მინიმალური კომპეტენციის დაკმაყოფილებით დაფინანსდება სწავლის საფასურის მინიმუმ 50%-ით, ხოლო მრავალშვილიანი ოჯახებიდან გამოსული, სოციალურად დაუცველი, მაღალმთიანი რეგიონების მცხოვრები სტუდენტები 100%-ით დაფინანსდებიან;
- სწავლებაშეჩერებულ სტუდენტებს მიენიჭებათ გამოცდების ჩაბარების უფლება და, გარკვეული კრიტერიუმების დაკმაყოფილების შემთხვევაში, ექნებათ სახელმწიფოს ხარჯზე სწავლის გაგრძელების შესაძლებლობა;
- სკოლამდელი აღზრდის სისტემა დაბრუნდება განათლების სამინისტროში და მას უზრუნველყოფს სახელმწიფო;
- სკოლამდელი დაწესებულებების აღმზრდელებს მიენიჭებათ პედაგოგის სტატუსი;
- გაიზრდება სახელობო სასწავლებლების დაფინანსება.
