• უსაფრთხო და პროგნოზირებადი ბიზნესგარემოს ჩამოყალიბება;
• აქტიური ანტიმონოპოლიური პოლიტიკის გატარება;
• მცირე ბიზნესის განვითარება და მისთვის ფინანსურ რესურსებზე წვდომის უზრუნველყოფა;
• სოფლის მეურნეობის განვითარების ხელშეწყობა.
  

აღნიშნული მიმართულებები ითვალისწინებს შემდეგი ძირითადი ინიციატივებისა და ღონისძიებების გატარებას:

• უნდა განხორციელდეს ბიზნესის დეკრიმინალიზაცია ანუ შეწყდეს ბიზნესის სისხლის სამართლებრივი დევნა, გაუქმდეს წინასწარი პატიმრობა  ეკონომიკური დანაშაულისთვის, აიკრძალოს ბიზნესზე სახელმწიფო ტერორი, უარი ითქვას სადამსჯელო და ჩასაფრების პოლიტიკის გატარებაზე;
• ორგანულ კანონად უნდა ჩამოყალიბდეს „საქართველოს საგადასახადო კოდექსი“. მასში ცვლილებების, დამატებებისა და შესწორებების შეტანა უნდა მოხდეს მხოლოდ წინასწარი ერთთვიანი საჯარო განხილვების საფუძველზე;
• დაცული უნდა იყოს თავისუფალი კონკურენცია და ქვეყანაში ამოქმედდეს სრულფასოვანი ანტიმონოპოლიური, ანტიტრასტული კანონმდებლობა;
• დაწესდეს დაბეგვრის საშეღავათო რეჟიმი მცირე საწარმოებისთვის;
• დაბეგვრის საშეღავათო რეჟიმი მცირე საწარმოებისთვის გავრცელდეს სამეწარმეო საქმიანობის ისეთ სახეობებზე, როგორებიცაა: სოფლის მეურნეობის პროდუქტების პირველადი წარმოება, სოფლის მეურნეობის პროდუქტების გადამამუშავებელი წარმოება, კვების მრეწველობის პროდუქციის წარმოება, ტურიზმი, ექსპორტზე ორიენტირებული წარმოება;
• შეიქმნას „მცირე ბიზნესის განვითარების ფონდი“ და „სასოფლო ბანკი“ მცირე ბიზნესისა და სოფლის მეურნეობისთვის იაფი საკრედიტო რესურსის მიწოდების ხელსაყრელი პირობების უზრუნველყოფის მიზნით;