საქართველო აგრეთვე განსაკუთრებულ მნიშვნელობას ანიჭებს რუსეთის ფედერაციის მომიჯნავე რეგიონებთან, კავკასიის ერთიანი სხეულის განუყოფელ ჩრდილოკავკასიურ ნაწილთან კონტაქტების ხელშეწყობას. საამისოდ საქართველოს პარლამენტმა, ერთიანი ნაციონალური მოძრაობის ფრაქციის ინიციატივით, მიიღო ჩრდილოეთ კავკასიასთან თანამშრომლობის სტრატეგია. ჩვენი ამოცანაა, საერთაშორისო სამართლის ფუნდამენტური პრინციპების ფარგლებში, ხელი შევუწყოთ საქართველოს მოქალაქეებისა და ჩრდილო კავკასიელთა ეკონომიკურ და კულტურულ კონტაქტებს. ჩვენ ასევე მივიჩნევთ, რომ სტაბილურობის და ადამიანის უფლებათა პატივისცემის მიღწევა ჩრდილოეთ კავკასიაშ საქართველოს ხანგრძლივვადიან სტრატეგიულ ინტერესს წარმოადგენს.
როგორც აღინიშნა, საქართველოსათვის მეტად აქტუალურია ორმხრივი თუ მრავალმხრივი თანამშრომლობა შავი ზღვის აუზის ქვეყნებთან.ერთიანი ნაციონალური მოძრაობა თვლის რომ საქართველომ უნდა შეინარჩუნოს და მაქსიმალურად გაზარდოს უკრაინასთან სტრატეგიული პარტნიორობის შესაძლებლობები. საქართველო და უკრაინა თანამშრომლობენ საგარეო პოლიტიკისა და უსაფრთხოების სფეროებში არა მხოლოდ ორმხრივ ასევე მრავალმხრივ ფორმატებშიც.
თურქეთი საქართველოს ყველაზე დიდი სავაჭრო და ეკონომიკური პარტნიორია. საქართველოსა და თურქეთს შორის მოქმედებს თავისუფალი ვაჭრობისა და უვიზო მიმოსვლის რეჟიმები. ეკონომიკური ურთიერთობების გაღრმავებას და ენერგეტიკული, სატრანსპორტო და სხვა პროექტების წარმატებით განხორციელებას ორივე ქვეყნისათვის სტრატეგიული მნიშვნელობა აქვს. საქართველო და თურქეთი თანამშრომლობენ ისეთ რეგიონულ პროექტებში, როგორებიცაა ბაქო-თბილისი-ჯეიჰანის ნავთობსადენი და ბაქო-თბილისი-ერზერუმის გაზსადენი. ასევე მნიშვნელოვანია დაგეგმვისა და განხორციელების პროცესში მყოფი რეგიონული ენერგეტიკული და სატრანსპორტო პროექტები, თეთრი ნაკადი და ბაქო-თბილისი-ყარსის სარკინიგზო მაგისტრალი. ჩვენ მივიჩნევთ, რომ ასევე მნიშვნელოვანია კულტურის სფეროში ურთიერთთანამშრომლობის გაღრმავება.
