საჯარო მოხელეების დაცვის ქმედითი მექანიზმების შემუშავება;
ჩრდილოვანი ეკონომიკის მასშტაბების შემცირება და შედეგად საბიუჯეტო შემოსავლების ზრდა;
სახელმწიფო აუდიტის სამსახურის გადაქცევა საბიუჯეტო პროცესის მონაწილედ, რომლის ძირითადი საქმიანობა იქნება შესაბამისობისა და ეფექტიანობის აუდიტის განხორციელება.
განხორციელებული რეფორმების შედეგად:
საბიუჯეტო პრიორიტეტები დადგინდება მოსახლეობის მონაწილეობით;
შესაძლებელი გახდება მოსახლეობის კეთილდღეობის ზრდაზე ორიენტირებული პროგრამების დაფინანსება;
ჩრდილოვანი ეკონომიკის მაჩვენებლის შემცირებით გაიზრდება ბიუჯეტის შემოსავლითი ნაწილი.
საგადასახადო პოლიტიკის სრულყოფისთვის:
უზრუნველვყოფთ სამართლიანობის პრინციპზე დაფუძნებული დაბეგვრის მექანიზმების არსებობას:
განვსაზღვრავთ საშემოსავლო გადასახადში დაუბეგრავ მინიმუმს, რომელიც საარსებო მინიმუმის ნიშნულის დონეზე იქნება დადგენილი. შემოვიღებთ ფიზიკური პირებისთვის გამოქვითვის გონივრულ სისტემას (ჯანდაცვასთან, დაზღვევასა და პროფესიული საქმიანობის შესრულებასთან დაკავშირებული ხარჯები);
მოვაწესრიგებთ მოგების გადასახადში გამოქვითვების სისტემას;
გადავხედავთ აქციზური საქონლის ნომენკლატურას და, ძირითადად, დაიბეგრება ფუფუნების საგნები;
გავაუქმებთ ქონების გადასახადში აფასების სისტემას და შევინარჩუნებთ რეალურ 1%-იან განაკვეთს;
უზრუნველვყოფთ სტაბილურ საგადასახადო გარემოს და არ დავუშვებთ საგადასახადო კანონმდებლობაში ხშირ ცვლილებებს;
მოვაწესრიგებთ საგადასახადო კანონმდებლობაში ბუნდოვან და ორმაგი ინტერპრეტაციის შესაძლებლობის მომცემ დებულებებს, გავამარტივებთ საგადასახადო ნორმებს;
უზრუნველვყოფთ საგადასახადო დავების განხილვაში სახელმწიფოს დომინანტური როლის შემცირებას და ადმინისტრაციულ პალატაში სპეციალიზებული მოსამართლეების დანიშვნას;
შევამცირებთ და გონივრულ ფარგლებში მოვაქცევთ ჯარიმებსა და საურავებს საგადასახადო და ადმინისტრირების სფეროში;
შევამცირებთ ადმინისტრაციული ორგანოების მიერ გაწეული მომსახურების საფასურსა და ბაჟს;
კანონით არ დავუშვებთ ახალმიღებული ცვლილებების მყისიერად ამოქმედებას და დავაწესებთ სულ ცოტა ორთვიან ვადას მისი მიღებიდან ამოქმედებამდე.
