ჩვენ მიერ შემუშავებული დასაქმების პოლიტიკა ეფუძნება ადამიანის უფლებების დაცვის, შრომის თავისუფლებისა და ღირსეული საარსებო  პირობების შექმნის პრინციპებს.

ამ პოლიტიკის განხორციელების შემთხვევაში თითოეულ  ადამიანს  გაუჩნდება  შესაძლებლობა:

• მოძებნოს თავისი კვალიფიკაციისა და გამოცდილების შესაბამისი სამუშაო ადგილი და მოახდინოს საკუთარი შესაძლებლობების რეალიზაცია;
• მიიღოს დამატებითი შემოსავლები და გაიუმჯობესოს სოციალური მდგომარეობა.

შედეგად: 

• შემცირდება მოსახლეობის მასობრივი გასვლა საზღვარგარეთ;
• შემცირდება სოციალური გაჭირვების ნიადაგზე ჩადენილ დანაშაულთა რიცხვი და ოჯახური კონფლიქტები;
• გაუმჯობესდება დემოგრაფიული მდგომარეობა.

სამუშაო ადგილების შესაქმნელად მნიშვნელოვანია ეკონომიკის რეალური სექტორის განვითარება და ინვესტიციები იმ სფეროებში, რომლებშიც უნდა შეიქმნას სამუშაო ძალის მოთხოვნა. ჩვენი ხედვები ორიენტირებულია ადამიანების კვალიფიკაციის ამაღლებაზე, რათა სამუშაო ძალა  გახდეს თანამედროვე ტექნოლოგიური მოთხოვნებისა და ინოვაციური განვითარების შესაბამისი.

დასაქმებაზე ორიენტირებული პოლიტიკა გულისხმობს ჩვენი ქვეყნის ეკონომიკის რეალურ განვითარებას. ეკონომიკურმა პოლიტიკამ  უნდა უზრუნველყოს სოფლის მეურნეობის, მასთან დაკავშირებული გადამმუშავებელი დარგების, მცირე და საშუალო ბიზნესის განვითარება. ამ მიზნით ჩამოყალიბდება საოჯახო და მცირე ბიზნესის განვითარების ფონდი. მნიშვნელოვანი ამოცანაა  შრომის ბაზრის სტრუქტურაში დაქირავებით მომუშავეთა რიცხვის განუხრელი ზრდა, აგრეთვე, თვითდასაქმებულთა წილის შემცირება ცალკეულ სექტორებში (ძირითადად, აგრარული სექტორი) კოოპერაციის, კომერციალიზაციის დონის ზრდისა და ტექნოლოგიური განვითარების შედეგად.

ჩვენი ერთ-ერთი უმთავრესი ამოცანაა ეფექტიანი და ცივილიზებული შრომის ბაზრის ჩამოყალიბება. შრომის კანონმდებლობის ევროპულ კანონმდებლობასთან ჰარმონიზაცია ამ ამოცანის შესრულების მნიშვნელოვანი კომპონენტია.

კანონმდებლობის ჰარმონიზაციისა და ცივილიზებული შრომის ბაზრის ფორმირებისთვის საჭიროა:

• ახალი შრომის კანონმდებლობის შემუშავება და მიღება;
• შრომის კანონმდებლობის რეფორმირება ეკონომიკაში შრომითი რესურსების ეფექტიანი განთავსებისა და გამოყენებისთვის დასაქმებულთა ძირითადი უფლებების მკაცრად დაცვით (შრომის სამართლიანი ანაზღაურების უფლება, სამუშაოდან დაუსაბუთებელი დათხოვნისგან დაცვის უფლება, გაფიცვის უფლება და სხვ.);
• უმუშევართა აღრიცხვის საინფორმაციო ბანკის შექმნა იმისათვის, რომ მოხდეს მათი გადამზადება და შესაბამისი სამუშაოს შეთავაზება;
• სახელმწიფოს მხრიდან უმუშევრების მხარდამჭერი ღონისძიებების ეფექტიანობის გაზრდა;
• სოციალური დიალოგისა და სოციალური პარტნიორობის ეფექტიანი სისტემის უზრუნველყოფა.