სიღარიბე არ დაიძლევა მხოლოდ მასთან „ბრძოლით", ისევე როგორც უმუშევრობა - დასაქმების პროგრამებით: თუ სწრაფი ტემპით არ განვითარდა ქვეყნის ეკონომიკა, შეუძლებელი იქნება კეთილდღეობის მაღალი სტანდარტის მიღწევა.

ქვეყნის სოციალურ-ეკონომიკური განვითარების ჩვენ მიერ დასახული კურსის შედეგად,   კონკრეტულ სარგებელს მიიღებს თითოეული მოქალაქე:

• იპოვის საკუთარი კვალიფიკაციისა და გამოცდილების ადეკვატურ სამუშაო ადგილს, რითაც შეძლებს საკუთარი შესაძლებლობების რეალიზაციას;

• გაუჩნდება შემოსავლები და გაუმჯობესდება მისი სოციალური მდგომარეობა.

შრომის კანონმდებლობის ევროპულ კანონმდებლობასთან ჰარმონიზაცია ამ ამოცანების რეალიზაციის მნიშვნელოვანი კომპონენტია. კანონმდებლობის ჰარმონიზაციისა და ცივილიზებული შრომის ბაზრის ფორმირების მიზნით:

• შეიქმნება უმუშევართა აღრიცხვის საინფორმაციო ბანკი, რათა შესაძლებელი გახდეს მათთვის ადეკვატური სამუშაოს შეთავაზება;

• დასაქმების სამსახურების ძალისხმევის ფოკუსირება მოხდება უმუშევრის მიერ ახალი სამუშაო ადგილის ძიების პერიოდის შემცირებასა და იმ უმუშევრების ხელშეწყობაზე, რომლებსაც აქვთ უმცირესი შანსი და შესაძლებლობა დასაქმებისათვის;

• შეიქმნება შრომითი დავების მოგვარების ეფექტური მექანიზმები;

• შეიქმნება სოციალური დიალოგისა და სოციალური პარტნიორობის ეფექტიანი სისტემა.

ჩვენ არავის მივცემთ უფლებას, შელახოს დასაქმებულის უფლებები. ასევე, შევქმნით ხარისხიან სამუშაო ადგილებს ახალგაზრდებისთვის. დასაქმების პოლიტიკა არ შეიძლება იყოს განხილული მხოლოდ ცალკე აღებულ სოციალურ მიმართულებად, შესაბამისად, კონკრეტული ნაბიჯები ეკონომიკაში და შედეგები წარმოჩენილია ჩვენი პროგრამის შესაბამის ნაწილებში შესაბამისი საპროგნოზო ახალი სამუშაო ადგილების მითითებით, თითოეული პროგრამის მიხედვით.