ღირსეული პენსია:
ჩვენთვის პენსია არის არა სოციალური შემწეობა, არამედ ხანდაზმულთა და საპენსიო ასაკის მოქალაქეების უფლება ღირსეულ და დამოუკიდებელ ცხოვრებაზე. დღეს მოქმედი საპენსიო სისტემა ვერ უზრუნველყოფს ფინანსურ მდგრადობას. პირიქით, ის აღრმავებს თაობებს შორის უთანასწორობასა და ხანდაზმულთა სიღარიბეს. ჩვენ შევქმნით სამართლიან და მდგრად საპენსიო სისტემას, რომელიც უზრუნველყოფს ყველა ხანდაზმულ მოქალაქეს უსაფრთხო და ღირსეული პენსიით და დაამკვიდრებს ურთიერთზრუნვის კულტურას.
ამ მიზნის მისაღწევად, ჩვენ გავზრდით საბაზისო პენსიას, გავამყარებთ ასაკობრივი პენსიის ზრდის საკანონმდებლო გარანტიებს. ეტაპობრივად დავნერგავთ საპენსიო სისტემის ახალ სვეტს, რომელიც თაობათა შორის სოლიდარობის პრინციპს დაეფუძნება, ისე როგორც ეს ევროკავშირის წევრ სახელმწიფოებშია. ამ პრინციპის მიხედვით, ახალი თაობა ზრუნავს წინა თაობაზე - დღევანდელი დასაქმებულების მიერ გადახდილი გადასახადებით ფინანსდება მოქმედი პენსიონერების ღირსეული სიბერე. დღევანდელი დასაქმებულების პენსიას კი, იმ დროისთვის არსებული დასაქმებულები დააფინანსებენ. აღნიშნული სისტემა შესაძლებელს გახდის, დანერგვიდან ერთი წლის შემდეგ, პენსიაზე ახლად გასულმა თანამოქალაქეებმა, სტაჟისა და გამოცდილების მიხედვით, სიცოცხლის ბოლომდე, ღირსეული პენსია აიღონ.
მოქმედი პენსიონერებისთვის მოხდება საპენსიო სესხების გაცემის პროცესის მკაცრი რეგულირება, პირველ რიგში მნიშვნელოვნად დაიკლებს საპროცენტო განაკვეთები. ჩვენ უზრუნველვყოფთ პენსიის გაცემის პროცესის სამართლიანი ტენდერის ჩატარებას და ამ პროცესში ბანკებისთვის კონკურენტული პირობებით მონაწილეობის შესაძლებლობას. ეს გააჯანსაღებს პროცესს და ხელს შეუწყობს კონკურენციის შედეგად, საპროცენტო განაკვეთების მეტად შემცირებას.
