"გახარია საქართველოსთვის" გუნდი მივიჩნევთ, რომ ჯანმრთელობის უფლება არის ადამიანის ფუნდამენტური უფლება, რომლის უზრუნველყოფაც სახელმწიფოს პოზიტიური ვალდებულებაა. ბოლო ათწლეულის განმავლობაში, საქართველოს ჯანდაცვის სისტემამ, ჩვენი გუნდის აქტიური ჩართულობით ხელისუფლებაში ყოფნის დროს, მნიშვნელოვანი ტრანსფორმაცია განიცადა. გაიზარდა სერვისებზე ხელმისაწვდომობა და შემცირდა მოსახლეობის „ჯიბიდან" დანახარჯები. თუმცა სისტემა, მნიშვნელოვანი გამოწვევების წინაშეა. რეალურად, ჯანდაცვის სისტემამ დაკარგა ჩვენი მთავარი მონაპოვარი - საყოველთაობა და ეტაპობრივად იკარგება მისი ხელმისაწვდომობაც. ჩვენი ჯანდაცვის პოლიტიკის მიდგომა მოიაზრებს საზოგადოებრივ სოლიდარობაზე დაფუძნებული მოდელის შექმნას, რომელიც უზრუნველყოფს გეოგრაფიულად და ფინანსურად ხელმისაწვდომი ხარისხიანი საყოველთაო ჯანდაცვის სისტემის შექმნას. აღნიშნულის მისაღწევად ჩვენ ვიმუშავებთ შემდეგი სტრატეგიული მიმართულებებით:

• პირველადი ჯანდაცვის სექტორის, როგორც სისტემის საფუძველის როლის გაძლიერება და ხარისხის გაუმჯობესება, რაც მნიშვნელოვანად განაპირობებს როგორც ჯანდაცვის სისტემის ხარისხისა და ეფექტურობას, ასევე ფინანსური რესურსების ხარჯვის ოპტიმიზაციას;

• შევიმუშავებთ და დავნერგავთ მოზარდთა ჯანმრთელობის პოლოტიკის სტრატეგიასა და სახელმძღვანელო პრინციპებს.

• სამედიცინო სერვისების მიწოდების გაძლიერება სტრატეგიული სახელმწიფო ჯანდაცვის ობიექტების გაძლიერებით;

• სასწრაფო გადაუდებელი სამედიცინო მომსახურების შესაძლებლობებისა და ეფექტურობის გაძლიერება;

• სამედიცინო სერვისების ხარისხის კონტროლის მექანიზმების გაძლიერება და მომსახურების ხარისხისა და ღირებულების დადგენა საერთაშორისოდ აპრობირებული მეთოდოლოგიით (DRG), იმისათვის, რომ დარგს მიეცეს მდგრადი განვითარების შესაძლებლობა, ხოლო პაციენტებისთვის მომსახურების ფასები იყოს პროგნოზირებადი;

• ჯანდაცვის სექტორში ადამიანური რესურსების განვითარება, პროფესიული კვალიფიკაციის გაძლიერების ხელშეწყობა და ჯანდაცვის სისტემაში ექთნების კომპეტენციების აღიარებისა და როლის გაზრდა; იდენტიფიცირებული დეფიციტური პროფესიებისთვის (ოჯახის ექიმი, სოფლის ექიმი და სხვ.) პროფესიაში მოზიდვის მიზნით წახალისების მექანიზმების დანერგვა;

•  მოსახლეობის უზრუნველყოფა მაღალი ხარისხისა და უსაფრთხო მედიკამენტებით. ეს მიღწეული იქნება როგორც ხარისხის კონტროლით, ისე მედიკამენტებზე ფასწარმოქმნის სისტემის გაუმჯობესებით, მონოპოლიებისა და „კარტელური" შეთანხმებების წინაააღმდეგ ბრძოლით

• საზოგადოებრივი ჯანდაცვის სისტემის გაძლიერება, საფრთხეებზე მზადყოფნისა და რეაგირების მართვის გაძლიერების, შესაბამისი ლაბორატორიული შესაძლებლობების განვითარების, საგანგებო სიტუაციებზე მზადყოფნის, რისკების შეფასებისა და კომუნიკაციის ეფექტური მექანიზმების დანერგვის გზით;

• ჯანდაცვის სექტორის მმართველობის გაძლიერება, მტკიცებულებებზე დაფუძნებული დიაგნოსტიკის პოლიტიკის განვითარებით, სახელმწიფო სტრუქტურებში სტრატეგიული დაგეგმვისა და ზედამხედველობის ფუნქციის გაძლიერებით, ანგარიშვალდებულებისა და გამჭვირვალობის უზრუნველყოფით, სამეცნიერო და საზოგადოებრივი ჯანმრთელობის კვლევების გაძლიერებითა, და საჯარო და კერძო სექტორს შორის თანამშრომლობის გაძლიერებით. 

• ჩვენ აუცილებლად მივიჩნევთ ჯანდაცვის სისტემის ეტაპობრივ გადაყვანას ჯანდაცვის სავალდებულო საყოველთაო დაზღვევის მოდელზე, რისთვისაც აუცილებელია შესაბამისი სამედიცინო-სამკურნალო და სადაზღვევო ინფრასტუქტურის მომზადება, ეფექტური და გამჭვირვალე მარეგულირებელი საკანონმდებლო და ინსტიტუციური მექანიზმების ჩამოყალიბებით.

• ჯანდაცვის ობიექტების ინფრასტრუქტურის გაძლიერებისთვის ჩვენ ბოლომდე მივიყვანთ ჩვენს მიერ დაწყებულ საქმეს, რაც გულისხმობს ჯანდაცვის სექტორის მოწყობის ევროპული გამოცდილების დანერგვას.

• ჯანდაცვის სექტორში ხელმისაწვდომობის უზრუნველყოფისა და არაკეთილსინდისიერი კომერციული ინტერესებისგან მოსახლეობის დასაცავად, სახელმწიფო განახორციელებს ხარისხიანი, ხელმისაწვდომი სერვისების არაკომერციული ინტერესებით მიწოდებას. 

• გავაგრძელებთ საქართველოს სამედიცინო ჰოლდინგის გაძლიერებას.