კოალიცია ცვლილებისთვის - ახალი, დროა, გირჩი-მეტი თავისუფლება
მნიშვნელოვანია, გაძლიერდეს კულტურის სფეროს მიმართ სახელმწიფოებრივი ხედვა.
აუცილებელია ხელოვნების დარგებში დაგროვილი პოტენციალისა და რესურსების ეფექტიანად გამოყენება. ინოვაციებისა და კონკურენციის ხელშეწყობით, უნდა გადავდგათ ნაბიჯი კულტურის ეკონომიკური პოტენციალის ზრდისა და გლობალურ ტენდენციებთან დაახლოების მიმართულებით.
ქართული კულტურა, როგორც ქართული თვითმყოფადობის გამოხატულება, უნდა გამოვიყენოთ ქვეყნის საერთაშორისო პოპულარიზაციისა და კონკურენტუნარიანობის გაზრდისთვის.
განსაკუთრებით საყურადღებოა კულტურული მემკვიდრეობის დაცვის საკითხი, მათ შორის, ტურისტულ პოტენციალში ჩართვის თვალსაზრისით. ელექტრონული ტექნოლოგიების გამოყენებით, ცოდნა და ინფორმაცია კულტურაში არსებულ მდგომარეობაზე ხელმისაწვდომი უნდა იყოს ფართო საზოგადოებისთვის.
მნიშვნელოვანია მუზეუმებისა და სხვა სოციალურ-კულტურული ობიექტების რეაბილიტაცია, რაც თბილისის კულტურულ და ტურისტულ შესაძლებლობებში მათ აქტიურ ჩართვას უზრუნველყოფს.
